غني براحتك
والبس ألف جوانتي فـ راحتك
عارف هزة إيدك لما بتكتب شعر
حافظ شكل حروفك صم
من أولها ... شميت ريحتك
غني براحتك
يا ما نصحتك
إوعاك تلبس يوم غير وشك
أصل صراحتك تفضح غشك
وانا والله باحب صراحتك
راجع ليه متخفي خلف قناع
مصنوع من نحتك ؟
أيوه أنا حاسس إنه صحيح من نحتك
وعشان تشعر إني بأحلى كلام ريحتك
قول لقناعك
إن " صباح الشعر" فراسته
عرفت مين الكائن تحتك
إوعى تظن بإني يا صاحبي دبحتك
قلبي عليك وانا ياما نصحتك
إوعى تخون فـ كتابتك نفسك
حب تكون فـ كتابتك نفسك
وارفض إن الرئة دي تطلّع يوم غير نفَسك
وعشان حق صداقة الشعر عليا
حيث دماغي نازل دايماً ضيف على ساحتك
ليلة إمبارح
وانت يا دوب بتحط قناعك
من غير قصد يا صاحْبي لمحتك
ليست هناك تعليقات:
إرسال تعليق